युनिकोड
विनिमय दर
सुन चाँदि
राशिफल
मौसम
शेयर बजार
पात्रो
काठमाडौं । आन्दोलनरत पक्षलाई कुनै कारवाही नगर्ने र बढुवाका लागि फागुन ६ गतेदेखि सुरु गर्ने सहमतिपछि धरानस्थित बीपी कोइराला स्वास्थ्य विज्ञान प्रतिष्ठानमा भएको झण्डै १ महिने आन्दोलन टुंगिएको छ ।
शनिबार प्रतिष्ठान व्यवस्थापन र आन्दोलनरत् शिक्षक तथा कर्मचारी कल्याण समाजबीच छ बुँदे सहमति भएपछि विगत २७ दिनदेखि जारी आन्दोलन टुंगिएको हो । सो प्रतिष्ठानका चिकित्सक, शिक्षक तथा कर्मचारीको आन्दोलन टुंगिएपछि सबै कर्मचारी आजैबाट काममा फर्किएका छन् ।
सहमतिअनुसार आन्दोलनरत शिक्षक, कर्मचारी तथा चिकित्सक आजदेखि नियमित काममा फर्केका हुन् । बढुवा प्रक्रिया अगाडि बढाएर आगामी फागुन ६ गतेदेखि अन्तर्वार्ता सुरु गर्ने र त्यसको एक सातभित्र नतिजा प्रकाशित गर्ने सहमति भएको छ ।
उच्च अदालत विराटनगरले बढुवा प्रक्रिया अघि बढाउन सक्ने आदेश दिएपछि शुक्रबार राति नै कार्यकारिणी समितिको बैठक बसेको थियो । उक्त बैठकले फागुन ६ गतेदेखि बढुवाको प्रक्रिया सुरु गर्ने निर्णय गरेपनि आन्दोलनरत शिक्षक, कर्मचारीले प्रतिष्ठानका कायमुकायम उपकुलपति प्राडा प्रल्हाद कार्कीले वार्ता गरेर लिखित सहमति जनाउनुपर्ने माग गरेपछि शनिबार वार्ता भएको हो ।
यस्तै आन्दोलनकारीलाई कुनै कारवाही नगर्ने पनि सहमति भएको छ । सहमतिपत्रमा प्रतिष्ठानका कामु उपकुलपति प्रा डा कार्की, शिक्षाध्यक्ष प्राडा सञ्जिवकुमार शर्मा, रजिष्ट्रार प्राडा सूर्यप्रसाद सङ्ग्रौला, अस्पताल निर्देशक डा जगतनारायण प्रसाद, शिक्षक कल्याण समाजका अध्यक्ष डा सेराल अहमद खान, कर्मचारी कल्याण समाजका अध्यक्ष कविता ढकाल र विद्यार्थी कल्याण समाजका अध्यक्ष डा ओमशान्ति रजकले हस्ताक्षर गरेका छन् ।
फाष्ट मिडिया नेपाल संवाददाता
