युनिकोड
विनिमय दर
सुन चाँदि
राशिफल
मौसम
शेयर बजार
पात्रो
हालसालै झापा जिल्लामा सवारी दुर्घटनाको घटनाहरू लगातार बढ्दै गइरहेका छन् । जिल्ला ट्राफिक प्रहरी कार्यालयको तथ्यांकले पछिल्ला २५ दिनमा मात्र १८ जनाले सवारी दुर्घटनामा ज्यान गुमाएको देखाउँछ । यो संख्या कुनै सामान्य चेतावनी होइन । हरेक दिनजसो हुने दुर्घटनाले सडकमा हुने लापरवाही, नियमको अवज्ञा र नियन्त्रणको कमजोरीलाई स्पष्ट देखाएको छ ।
अर्जुनधारा नगरपालिकामा ट्याक्टरबाट खस्दा १६ वर्षीय युवाको मृत्यु हुनु, स्कुटीको ठक्करबाट पैदलयात्रीले ज्यान गुमाउनु, र केही दिनअघि दमकमा टिपर दुर्घटनामा दुई जनाको मृत्यु हुनुजस्ता घटनाले हाम्रो सडक संस्कृति कति असुरक्षित बनिरहेको छ भन्ने कुरा उजागर गर्छ । अझ यात्रुवाहक बस तामाकोशी नदीमा खस्दा १२ जनाको ज्यान जानु त हाम्रो सडक सुरक्षा प्रणालीको गम्भीर कमजोरीको प्रमाण हो ।
यी घटनाहरू केवल संयोग होइनन् । चालकको लापरवाही, मादक पदार्थ सेवन गरी सवारी चलाउने बानी, सडक मर्मतको अभाव, आवश्यक ट्राफिक संकेत नहुनु, र यात्रुहरूले समेत सावधानी नअपनाउनु—यी सबै कारणहरू एकैसाथ जोडिएर दुर्घटनाका कारक बन्छन् । अब दुर्घटनापछि मात्र प्रतिक्रिया दिने होइन, दुर्घटनाअघि नै रोकथामका ठोस कदम चाल्नु अपरिहार्य भइसकेको छ ।
सवारी चालक अनुमति पत्र बिना सवारी चलाउने, गति सीमा उल्लङ्घन गर्ने र मादक पदार्थ सेवन गर्ने चालकलाई कडा कारबाही गर्नुपर्छ । सडक पूर्वाधार सुधारः खाल्डाखुल्डी, संकेत बोर्डको अभाव, र अन्धो मोडहरू सुधार गर्न स्थानीय र संघीय सरकार दुवैले प्राथमिकता दिनुपर्छ । सजगता र प्रशिक्षणः चालकहरूका लागि नियमित ट्राफिक सचेतना तथा सुरक्षित ड्राइभिङ तालिम अनिवार्य गरिनुपर्छ ।
पैदलयात्रीदेखि यात्रुहरूसम्म सबैले ट्राफिक नियमको सम्मान गर्ने संस्कार विकास गर्नुपर्छ ।
दुर्घटनापछि तुरुन्त उद्धार र उपचारका व्यवस्था सुनिश्चित गर्नुपर्छ । दुर्घटना रोकिने होइन भन्नु जिम्मेवारीबाट पन्छिने कुरा हो । अनुशासन, सतर्कता र जिम्मेवार प्रणालीमार्फत दुर्घटनाको जोखिम घटाउन सकिन्छ । प्रत्येक मृत्यु एउटा परिवारको पीडा मात्र होइन, हाम्रो राज्य र समाजको असफलताको संकेत पनि हो । सडकमा गति होइन, जीवनको सुरक्षा प्राथमिकतामा परोस् ।
फाष्ट मिडिया नेपाल संवाददाता
