साडीको पावर र प्रयोग : साडीले बचाएका २१ तिर्थयात्री

एजेन्सी । रसुवामा आएको भीषण बाढीमा एउटा सामान्य साडी भारतको तामिलनाडुका २१ जना तीर्थयात्रीहरूका लागि जीवनरक्षक बनेको छ ।

त्यहाँ एक दम्पतीले अचानक आएको भीषण बाढीको समयमा अलपत्र परेका महिलाहरूलाई ठाडो र हिलो ढलानबाट माथि तान्न यसलाई कामचलाउ डोरीको रूपमा प्रयोग गरेका छन् ।

भदौ १० गते कैलाश मानसरोवर यात्रामा रहेका तामिलनाडुका २१ जना तीर्थयात्रीहरू नेपालको टिमुरे नजिकै हुँदा यस क्षेत्रमा भीषण बाढी र पहिरो आयो ।

नजिकै पानी र भग्नावशेषको ठूलो छाल ठोकिँदा उनीहरूको सवारी साधन एउटा सुरक्षित घुम्तीमा रोकिएकाले बगाउनबाट जोगियो । उक्त समूह हतार–हतार गाडीबाट बाहिर निस्किए र उच्च स्थानमा पुग्न चिप्लो र हिलोले भरिएको पहाडी ढिस्कोमा चढ्ने प्रयास गरे ।

रत्नकुमार नामका एक तीर्थयात्री र उनकी श्रीमती पुन्गुझाली सुरक्षित रूपमा उच्च स्थानमा पुग्न सफल भए । तलको खतरनाक र हिलो ढलानमा अन्य महिलाहरू संघर्ष गरिरहेको देखेपछि पुन्गुझालीले आफ्नो स्वेटर लगाइन्, साडी खोलिन् र त्यसलाई तल झारिन् भनी रिपोर्टहरूमा उल्लेख छ ।

फसेका तीर्थयात्रीहरूले सहाराका लागि धातुको तारसँगै त्यो बलियो कपडालाई समाते । त्यसले गर्दा दम्पती र अन्य मानिसहरूले उनीहरूलाई एक–एक गरी सुरक्षित रूपमा माथि तान्न सफल भए । उक्त समूहले अधिकारीहरूसँग सम्पर्कमा रहँदै स्थानीयले उपलब्ध गराएको थोरै खाद्यान्न र बोतलको पानीको भरमा करिब दुई दिन बिताए ।

भारतीय दूतावास, नेपाली सेना र तामिलनाडु राज्यका अधिकारीहरूले बाँचेकाहरूको हेलिकप्टरबाट उद्धार गर्न र उनीहरूलाई सुरक्षित रूपमा भारत फिर्ता ल्याउन बहुनिकाय उद्धार कार्यको समन्वय गरेको न्युज१८ ले समाचार प्रकाशन गरेको छ । क्लिकमाण्डु