मोरङ र सुनसरीबाट मोटरसाइकल चोरेर भारतमा बिक्री गर्ने नाइकेसहित २ जना मोरङ प्रहरीको कष्टडीमा

इटहरी । इटहरी ८ पूर्वी गैसारमा कृष्ण खड्काको नयाँ मोटरसाइकल बाहिर राखेर खाना खान पस्दा विहान १० बजे चोरले उडाईदियो । त्यो मोटरसाइकल खोज्न चारैतिर प्रहरी र स्थानीयबासी लागे तर फेला परेन् । उनीहरु इनरुवा पुगे । इनरुवा प्रहरीले यहाँभित्रको गाउँमा जानुस् मटरसाइकल त्यही छ तर तपाई फर्केर आउने नआउने भगवानको खट्न हो भनेको हामीलाई किस्सा जस्तै सुनाएका थिए । सोही कुरा आज मोरङ प्रहरीले २ जनालाई पक्राउ गरेर प्रमाणित गरिदिएको छ । मोरङ र सुनसरीबाट सय बढी मोटरसाइकल चोरको घटनामा संलग्न भएका त्यही क्षेत्रका अर्थात भोक्राहा नरसिंह गाउँपालिका र हरिनगरा गाउँपालिकाबासी पक्राउ परेका छन् । ४० वर्षीया नजाम अन्सारी हरिनगरा–६ का हुन भने २३ वर्षीया  नाइके निकाइल अन्सारी भोक्रा नरसिंह २ क हुन् । विभिन्न स्थानबाट मोटरसाइकल चोरी गरेर भारत पुर्याएर बिक्री गर्ने गिरोहका मुख्य नाइकेसहित दुई जनालाई पक्राउ गरिएको मोरङ प्रहरीले जनाएको छ ।

उनका अनुसार गिरोहले मोरङ र सुनसरीका विभिन्न स्थानबाट सयभन्दा बढी मोटरसाइकल चोरी गरेर भारतमा पु¥याई बिक्री गरिरहेको पत्ता लागेको छ ।

दुवै जना गत मंसिर २९ गते विराटनगरबाट पक्राउ परेका हुन् । तीमध्ये नजामको साथबाट १.३ ग्राम लागूऔषध ब्राउन सुगर बरामद भएको थियो । दुवै जनाले विभिन्न स्थानबाट मोटरसाइकल चोरी गरेको देखिने सीसी क्यामेरा फुटेजसमेत प्राप्त भएको डीएसपी दाहालको भनाइ छ ।

विराटनगर महानगरपालिका–२ बन्जरा चोकबाट गत भदौ १० गते को २६ प ७७७६, विराटनगर–४ नोबेल अस्पताल परिसरबाट असोज १५ गते को ४३ प ४८०४, विराटनगर–७ सेन्ट्रल मलको अण्डर ग्राउण्ड पार्किङबाट मंसिर ६ गते को १० प ९५६६ र विराटनगर–९ गुद्री बजारबाट मंसिर ८ गते को २८ प ७८१५ नम्बरको मोटरसाइकल चोरी भएको थियो ।

त्यस्तै, विराटनगर–७ कोशी अस्पताल परिसरबाट मंसिर ९ गते को २५ प १८११, नोबेल अस्पतालको पार्किङबाट मंसिर २२ गते को २९ प ५५४ तथा विराटनगर–६ भाटभटेनी सुपरपार्केको पार्किङस्थलबाट मंसिर २७ गते को २१ प ५८९४ नम्बरको मोटरसाइकल चोरी भयो ।

दाहालका अनुसार पीडितबाट जाहेरी लिएर अनुसन्धान सुरु गर्दा संगठित गिरोहले मोरङ र सुनसरीमा मोटरसाइकल चोरी गर्ने धन्दा चलाइरहेको पत्ता लागेको छ ।

चोरी गरिएको मोटरसाइकल जोगवनी, फारवेसगन्ज र फुल्काहालगायतका भारतीय बजारमा पुर्याएर बिक्री गर्ने गरेको उनले बताए । मोटरसाइकल चोरीमा संलग्न दुवै जनाविरुद्धको अनुसन्धान सकेर प्रहरीले सोमबार सरकारी वकिल कार्यालय मोरङमा मिसिल बुझाएको छ ।

नजाम र निकाइलविरुद्ध चोरीको कसुरमा ७ वटा तथा नजामविरुद्ध भने लागूऔषध ऐनअन्तर्गतको समेत मुद्दा चलाउनुपर्ने रायसहितको मिसिल प्रहरीले सरकारी वकिल कार्यालयमा बुझाएको हो ।

अनुसन्धानबाट प्राप्त प्रमाण र तथ्यसहितको मिसिलका आधारमा सरकारी वकिल कार्यालयले अभियोगपत्र तयार पार्दै अभियुक्तविरुद्ध अदालतमा मुद्दा दायर गर्नेछ । दुवै जनाविरुद्ध भ्याएसम्म मंगलबार, नभए बुधबार मुद्दा दर्ता गर्ने तयारी रहेको वकिल कार्यालयले जनाएको छ ।