उर्लाबारी–पथरी जोड्ने पुल तयार पछि दशकौं सपना पुरा हुँदै

ज्योति शर्मा, उर्लाबारी

मोरङको उर्लाबारी नगरपालिका–३ र पथरीशनिश्चरे नगरपालिका–२ को सिमानामा पर्ने सुनझोडा खोलामा निर्माणाधीन मोटरेवल पुल अन्तिम चरणमा पुगेसँगै स्थानीयवासीमा उत्साह थपिएको छ । वर्षौंदेखि ज्यानकै जोखिम मोलेर खोला तर्न बाध्य नागरिक अब सुरक्षित र सहज आवतजावतको आशामा छन् ।

सुनझोडा खोला यस क्षेत्रका नागरिकका लागि वर्षायाममा विशेष त्रासको विषय बन्दै आएको थियो । विद्यालय जाने विद्यार्थी, बिरामी बोकेर अस्पताल पुग्ने परिवार, किसान तथा दैनिक कामकाजमा हिँड्ने सर्वसाधारणले खोलामा आउने बाढीका कारण पटक–पटक सास्ती खेप्दै आएका थिए । कतिपय अवस्थामा खोला तर्दा दुर्घटनाको जोखिमसमेत रहने भएकाले परिवारका सदस्य घरबाट निस्कँदा सकुशल फर्किन्छन् कि फर्किँदैनन् भन्ने चिन्ता स्थानीयमा रहने गरेको थियो ।

स्थानीयवासीका अनुसार प्रत्येक चुनावमा पुल निर्माणको मुद्दा प्रमुख एजेण्डा बन्ने गरे पनि काम भने अघि बढ्न सकेको थिएन । पटक–पटक योजना बनेर पनि अलपत्र पर्ने अवस्थाका बीच गत वर्षदेखि भने निर्माणले तीव्रता पाएको हो । मोरङ क्षेत्र नं। १ का संघीय सांसद तथा पूर्व खेलकुद मन्त्री डिगबहादुर लिम्बू र मोरङ क्षेत्र नं। ३ का सांसद डा। सुनिल शर्माको सक्रिय चासोपछि पुल निर्माण प्रक्रिया अघि बढेको स्थानीय पूर्व जनप्रतिनिधि पारशमणि कुईकेल बताउँछन् । गत वर्ष जेठ १७ गते शिलान्यास गरिएको पुलको निर्माण अवधि २०८३ चैत मसान्तसम्म तोकिए पनि निर्माण कम्पनीले निर्धारित समयभन्दा निकै अगावै काम सम्पन्न गर्ने तयारी गरेको छ । कुइँकेलले लामो समयदेखिको जनअपेक्षा पूरा हुने चरणमा पुगेको भन्दै दुवै सांसद र निर्माण पक्षलाई धन्यवाद दिएका छन् । उनका अनुसार पुल निर्माणले दुई नगरपालिकाबीचको सम्बन्ध मात्र नभई आर्थिक तथा सामाजिक गतिविधिसमेत विस्तार हुने अपेक्षा गरिएको छ ।

निर्माण पक्षका प्रतिनिधि दिलिपकुमार कर्णका अनुसार पुलको करिब ८५ प्रतिशत भौतिक प्रगति सम्पन्न भइसकेको छ । अहिले दुवैतर्फ माटो पुर्ने, पाइप रेलिङ जडान गर्ने लगायतका अन्तिम चरणका काम भइरहेको र केही दिनभित्रै सम्पूर्ण काम सम्पन्न गरी हस्तान्तरण गर्ने तयारी रहेको उनले जानकारी दिए ।

स्थानीय पूर्वाधार विकास आयोजना कार्यालय इटहरीका इञ्जिनियर थिरेन्द्र दाहालका अनुसार पुल ३० मिटर लामो रहेको छ । पुलको बीच भागमा ६ मिटर चौडाइको सवारी आवागमन मार्ग रहनेछ भने दुवैतर्फ पैदलयात्री हिँड्न मिल्ने संरचना बनाइएको छ । प्रारम्भिक लागत अनुमान ८ करोड ३० लाख रुपैयाँ रहेको पुल प्रतिस्पर्धात्मक टेण्डर प्रक्रियामार्फत ५ करोड ६८ लाख ९३ हजार ८ सय ५५ रुपैयाँ ७७ पैसामा निर्माण भइरहेको हो । निर्माणको जिम्मा विराटनगरस्थित कार्की बन्धु कन्स्ट्रक्सन प्रा।लि।ले पाएको थियो ।